Tamasha la Krismas kufanyika Uwanja wa Taifa desemba 25.

WAANDAAJI wa Tamasha la Krismas wametangaza kuwa tamasha hilo litafanyika Uwanja wa Taifa, Dar es Salaam Desemba 25 mwaka huu.

Taarifa iliyotolewa kwa vyombo vya habari leo na Mwenyekiti wa Kamati ya Maandalizi ya tamasha hilo, Alex Msama ilieleza kuwa awali mikoa sita iliomba kuwa mwenyeji wa tamasha hilo, lakini kamati yake imeteua Mkoa wa Dar es Salaam uwe wa kwanza. “Kamati ya Maandalizi ya Tamasha la Krismas imeamua lifanyike Uwanja wa Taifa, Dar es Salaam, halafu Desemba 26 tutatizama mkoa mwingine. Tunaomba mashabiki wetu waendelee kutuunga mkono,” alisema Msama.

Alisema awali walipokea maombi kutoka kwa wadau mbalimbali wa muziki wa Injili nchini wakiomba lifanyike katika mikoa yao, ambayo ilikuwa ni Mbeya, Mwanza, Arusha, Dodoma, Dar es Salaam na Shinyanga.

Tamasha la Krismas linaandaliwa na Kampuni ya Msama Promotion ya jijini Dar es Salaam, ambayo pia huandaa Tamasha la Pasaka kila mwaka.  Kwa mujibu wa Msama wanataka Tamasha la Krismas liwe bora zaidi kuliko la Pasaka kwa kualika wasanii maarufu kutoka nje na ndani ya Tanzania.

Alisema hilo litakuwa tamasha kubwa la nyimbo za kumsifu Mungu na litakuwa na tofauti kubwa iilinganisha na matamasha mengine yaliyowahi kuandaliwa na kampuni yake.