PR PROMOTION YAUNGANA NA BTL KUDHAMINI PAMBANO LA MAUGO NA MATUMLA

KAMPUNI ya Business Times, na Kampuni ya PR PROMOTION Kupitia Blog yake ya prhabari.blogspot.com zimejitosa kudhamini pambano la ngumi lisilokuwa la ubingwa kati ya bondia wa ngumi za kulipwa nchini, Mada Maugo dhidi ya Rashid Matumla ambalo linatarajiwa kupigwa Julai 18 mwaka huu katika Ukumbi wa PTA Sabasaba, jijini.
Akizungumza na gazeti hili, Mratibu wa pambano hilo, Suleiman Semunyu amesema Business Times ambao na ni wachapishaji wa magazeti ya Majira, Dar Leo, Spoti Starehe, Business Time, pia wamiliki wa kituo cha Redio cha 100.5 Times FM na Kampuni ya uchapishaji ya Business Printer ni moja wa wadhamini waliojitokeza kudhamini pambano hilo.

Pia alisema Kampuni ya PR Promotion Inayo miliki Blog ya prhabari.blogspot.com ambayo kwa sasa inakuja juu kwa kutoa habari za uhakika na kusisimua miongoni mwa jamii nayo imejiotosa kudhamini kwa kutoa matangazo mbalimbali yanayo husu mpambano huo.

Amesema pambano hilo linatarajiwa kuwa la aina yake kutokana na upinzani mkubwa uliopo kati ya mabondia hao ambapo litakuwa la uzito wa Middle Weight na litapigwa katika raundi 10.
"Tumeandaa pambano la aina yake kati ya Matumla na Maugo ambapo tunatarajia litakuwa na upinzani mkubwa kutokana na rekodi za mabondia wote, maandalizi yameshakamilika ambapo pia mabondia wanaendelea na mazoezi makali" alisema Semunyu.
Amesema pia pambano hilo limedhaminiwa na Redio Passion FM, Konsalt pamoja na Kampuni ya PSI.
Amesema kuwa katika pambano hilo pia kutakuwa na mapambano mbalimbali ya utangulizi ambapo bondia Abdalah Mohamed atazichapa na Said Zungu katika pambano la uzito wa Light Weight la raundi nne, Fadhil Maji atapigana na Sadick Abdulaziz katika pambano la uzito wa Fly la raundi nne.
Bondia Juma Afande atazichapa na Kitandula Zuberi katika pambano la Super Bantam la raundi nne, Juma Selema atapigana na Iddy Mgodomi katika pambano la uzito wa Fly la raundi nne, Anton Mathias atazitupa na Hemed Mohamed katika pambano la Super Fly la raundi nne.
Imeandikwa na Victor wa Dar leo